Póstny wopor młodźiny
za misionsku staciju benediktinow w albanskim Fushë-Arrëzu
Što je póstny wopor młodźiny?
Z póstnym woporom podpěruja młodostni kóžde lěto ludźi, kotřiž su na pomoc druhich pokazani. Akcija započina so popjelnu srjedu a kónči so jutry. Dary pak so přez cyłe lěto přijimuja.
Kak hodźi so póstny wopor podpěrać, a čehodla so to wudani?
Z póstnym woporom młodźiny maja młodostni a młodźinske skupiny přiležnosć, ze zajimawym krajom so rozestajeć a něšto dobre činić. Nimo toho nazhonjeja, kak móža dary za dobry skutk zběrać. Tak móža ze swojej skupinu na młodźinskim wječoru wo temje abo z akciju dary zběrać – z kolektu, cyrkwinskim kofejom abo předawanjom jutrownych swěčkow.
Dary za póstny wopor młodźiny měli na sćěhowace konto přepokazać abo we wobalkach na Božich mšach we wosadźe wotedać:
Mějićel: Bistum Dresden-Meißen
IBAN: DE65 7509 0300 0008 2948 79
Banka: Liga Bank EG
Hesło: Jugendfastenopfer 2026
Póstny wopor 2026 
Z lětušim póstnym woporom młodźiny chcedźa misionsku staciju a socialne dźěło kapucinow w Albanskej podpěrać. Zwisk nasta na iniciatiwu Antona Schreibera, młodeho dorosćeneho z Drježdźansko-Mišnjanskeho biskopstwa. Wón budźe kapucinow, kotřiž so na městnje wo ludźi staraja, wot awgusta podpěrać. Nimo ambulancy tež domjace wopyty we wotležanych hórskich wsach k tomu słušeja – na špatnych dróhach a z wysokimi kóštami.
Ćežko chora mać, nan w boju přećiwo swojej chcyćiwosći, 14lětny syn – a dom, přez kotrehož třěchu so dešćuje a sněži. Nimo medicinskeho zastaranja woznamjenja pomoc tule tež: pozbudźować Mut machen, znowa započeć, dom zaso tak zreparować, zo móžeš w nim bydlić.
Rozprawa kapucina Jeremiasa Borgardsa je tež na internetowej stronje stacije, w blogu wo Albanskej, podata: https://www.ambulanz-albanien.org/2528699_grosseinsatz-in-der-region-tropoja.
Telewizijny sćelak Arte je tohorunja wobhladanjahódnu reportažu wo dźěle kapucinow na městnje zhotowił, a tu nańdźeće pod https://www.arte.tv/de/videos/123341-004-A/re-vergessene-doerfer-in-albaniens-bergen/ .
Albanska
Albanska je poměrnje mały kraj na Balkanje. Přibližnje dwaj milionaj ludźi bydli na něhdźe 28 000 kwadratnych kilometrach, štož wotpowěduje połdra přestrjeni Sakskeje, za to pak z dwójce telko wobydlerjemi. Ličba wobydlerjow w juhowuchodnym europskim kraju rapidnje woteběra, něhdźe 10 procentow, wosebje młodych ludźi z wukubłanjom, kóžde lěto kraj wopušća. Zwostawaja stari, chori a někotři, kotřiž so wo nich staraja – kaž kapucinojo w sydlišću Fushë-Arrëz. Wone leži w jednym z najchudšich kónčin Albanskeje. Zhromadnje z franciskankami pomhaja kapucinojo z pěstowarjom, dušepastyrstwom a předewšěm z ambulancu ludźom, kotřiž njemóža sej lěkarsku pomoc hewak dowolić.
Byrnjež chorobne zawěsćenje eksistowało, dyrbiš wjele lěkowanjow priwatnje zapłaćić. Mnoho swójbam to móžne njeje. W misionskej staciji zastaruja tohodla hač do 50 pacientow w jeničce dwěmaj hodźinomaj, rozprawja bratr Jeremias Borgards, kiž ambulancu nawjeduje. Dźěło financuja bjezwuwzaćnje z darow. Dokelž su wone wobmjezowane, jara wjele pobrachuje: wobalenski material, medikamenty, desinfekciske srědki, diesel. Samo srědki přećiwo bolosćam njejsu samozrozumliwe, operacije dyrbja zdźěla bjez narkozy přewjesć.
Franz Adler/jw