Nowej sobudźěłaćerce za młodźinu a dźěćinu
Wot meje sem podpěratej w Don Boskowym Domje we Worklecach Alena Šołćic a Hanka Wróblec team serbskeho dušepastyrstwa. Tu so woni skrótka předstajitej.
Ja sym Alena Šołćic (21) a pochadźam z Pančic-Kukowa. Tučasnje studuju w Drježdźanach w 6. semestrje wodowe wědomosće (Hydrowissenschaften). W mojim swobodnym času so hižo dołho angažuju w dekanatnym młodźinskim kružku a druhich cyrkwinskich zastojnstwach. W přichodnym lěće zastupuju Luciju na městnje młodźinskeje referentki.
Mój cil?
Přikład być w žiwej wěrje - modlitwu a bibliju jako zakład wěry do mojeho wšědneho dnja integrować.
Najlubše městno w Bibliji?
Jezaja 43,1 sć.
“Njeboj so, přetož wukupju će a zawołam će z mjenom. Mój ty sy!
Hdyž póńdźeš přez wody, budu z tobu, abo přez rěki, njezalija će.”
Što měł kóždy raz we wěrje wuspytać?
To wuspytać, štož je Boža wola, tež hdyž njewotpowěduje našej čłowječej logice. Před kóždym wulkim rozsudom so modlić a na wotmołwu posłuchać. Při tym nastanu najlěpše puće, přetož “Swój puć sej wumysli čłowječa wutroba, Knjez pak wjedźe jeho kročele.” (Př 16,9)
Wjeselu so hižo na dźěło z wami!
Pokročowanje sćěhuje...