Kreatiwne ideje k jutrownym swjatym dnjam zapodali
Serbske dekanatne dušepastyrstwo za dźěći a młodźinu je so přez socialne medije za kreatiwnymi idejemi a formami nastupajo wuznaće wěry, wopominanja martrowneho tydźenja a wozjewjenje radosće zrowastanjenja pod tučasnymi wuměnjenjemi naprašowało. Wuzwolene namjety su tule zjimane.
Za martrowny tydźeń bu namjet zapodaty, zo móhli sej wzajomnje wšědnje citat, mysl abo próstwu pod samsnym titulom (hashtag) na facebooku a instagramje pod mjenom #martrownytydzen2020 dźělić. Wšitcy su přeprošeni, so na tym wobdźělić.
Dalši namjet běše, zo móhli zeleny štwórtk do wusyłanych kemšow w swójbach (samopječeny) chlěb łamać, potajkim jón dźělić a Jězusowu poslednju wječer ze swojimi wučomnikami wopominać. We Wosadniku pod čisłom 16 su wšelake modlitwy do jědźe a po njej podate. Wězo hodźa so k tomu tež čitanja zeleneho štwórtka, kotrež su na poslednjej stronje Katolskeho Posoła pod rubriku „wot njedźele do njedźele“ wozjewjene.
Bjez hołka a tołka móže so Jězusowe ćerpjenje a jeho smjerć wulki pjatk wopominać. Přihoty kaž su wone hewak k jutram z wašnjom, wšak su lětsa wo wjele snadniše. Tež reflektowanje wo swojim žiwjenju móhło na tym dnju k tomu słušeć. Za wulki pjatk wozjewi młodźinske a dźěćace dekanatne dušepastyrstwo křižowy puć za dźěći a swójby kaž tež dalši za młodostnych w interneće. Tute móža so w swójbach wopominać.
Štóž chce, móže sej sam jutrownu swěčku spaslić. K tomu hodźi so na přikład wóskowa skorpizna někotrych twarožkowych družin. W jutrownej nocy móhli ju po wusyłanej Božej mši zawěsćenu do wokna stajić.
Wjacore razy bu namjetowane, štož jewješe so tež hižo w zašłym Katolskim Posole, zo móhli jutrońčku po kemšach ze wšěch domow won jutrowne kěrluše zaklinčeć, a to spěwajo abo tež z hudźbnym instrumentom. Jedyn přispomni: „Zaspěwam, ručež je wusyłanje kemšow nimo, z woknom won ,Haleluja, zwońće zwony!ʻ A bych so wjeselił, hdy bychu to mnozy dalši runje tak činili.“ K tomu měnjachu někotři, zo móhli so tute zwuki natočić po tym w socialnych syćach dźělić a poselstwo takrjec ze wšěm swětom dźělić. K tomu hodźi so hashtag #jutry2020.
Jutrońčku móhli nimo toho wšitcy, kotřiž to maja, do swojeho statusa pola whatsapp napisać „Chryst je dobył, haleluja!“ Jako profilowy wobraz móhli pola whatsapp a w druhich socialnych syćach swójski wobraz jako křižer ze zašłych lět jako wuznaće swojeje wěry wužić.
Jako dalši namjet jewješe so, zo móhli so žony a holcy jutrońčku swoju swjedźensku narodnu drastu jako znamjo jutrowneje radosće woblec. Ničo njerěči přećiwo tomu, tež lětsa k jutram chorhoje – vatikanske a serbske – we wsy abo ze swójskich domow wupowěsnyć. Namjetowane bu tohorunja, swjate křiže we wsy lětsa wosebje rjenje wupyšić, ale tež, zo móžeš sej jutrońčku na youtube wideja křižerskich procesionow zašłych lět wobhladać. LŠ/KP
(z Katolskeho Posoła, 5.4.2020, str. 119)