Jězba serbskich młodostnych na pasijón do Oberammergauwa WOTPRAJENA

Wutrobnje přeprošamy was na jězbu serbskich młodostnych na swětoznate pasijónske předstajenje do Oberammergauwa (blisko Mnichowa) wot pjatka do njedźele, 8. do 10. meje 2020. Wotjědźemy pjatk nawječor. Jónkrótnje poskića so młodostnym ze wšeho swěta, sej tamnišu generalku wobhladać. Z tym maja młodostni wot 16 do 26 lět móžnosć, zastupny lisćik, kotryž hewak 150 eurow płaći, za 24 eurow dóstać. Po předstajenju změja samo składnosć, so z dźiwadźelnikami rozmołwjeć. Nimo toho postaraja so Oberammergaučenjo wo kwartěry a zastaranje za přihódnu płaćiznu. Zastup, zastaranje a nóclěh budźe něhdźe 60 eurow płaćić. K tomu přińdu kóšty za transfer.

Tuta jězba by móhła tež hodowny dar młodostnemu być. Dalše informacije su pod www.jugendtage-passionsspiele.de wozjewjene. Přizjewjenja přijimuja so we Worklečanskim dekanatnym młodźinskim dušepastyrstwje přez mailowu adresu don.boskowy-dom@t-online.de hač do srjedy, 11. decembra. Městna su wobmjezowane.